Kum 10 aia rei rorelna fawng kan chelh a ngai- Lalduhoma

by Editor

Tualchhung News

ZORAM TODAY| 23rd.October, 2025; Vawiin khan Zoram People's Movement, Aizawl East II Block te chuan Dawrpui Multipurpose Hall-ah Block Conference an hmang a, Chief Minister Lalduhoma chuan Khuallian niin a hmanpui.

Chief Minister chuan thusawiin, "Kohhran thiltihnaah chuan hun kan vawng dik em em a, pawl angah te hian hun kan vawng dik hleithei lova, hei hi kan inzirna tur a ni. Mihring hun vawng dik reng reng chu anmahni an invawng a, an thiltih an la thutak a, inthlahdah leh zawmthaw takin hun an hmang ngai lo. ZPM te hian party dang entawn tlak turin hma hruai ila, bulṭantu i ni ang u. Pathian chuan mihring mit hmuah pawh a mawi zawng turin min ti," a ti.

Lalduhoma chuan, ZPM kalkhawmna chu kan felfai tur a ni, Zu rui nena inchawmpawlh lutuka function hman te hi thil mawi a nih loh bakah a zahawm loh. Kan party pawh kan fihlim chho sawt hle a, a lawmawm tak zet a ni, a ti.

Lalduboma chuan, kan party mi leh sa contract hnathawk ten an thawk chhe tur a ni lo, mi pahnih khat lek hna tha lo, lo ti zeuh an awm hian a lar duh hle a ni. Kan sorkar hnua hnathawhte a tha tlangpui tawh niin ka hria a, State Project Monitoring Committee te an thawkrim bawk a, hma kan sawn chho hle a ni, a ti.

"Kan hmalakna leh kan hmachhawp hrang hrangte tun maiah kan hmu hman dawn lo, Kum 5 chhung hian tam tak hmuh hman loh tur kan nei a ni. Chuvang chuan a hlawhtlinna hmel hmu tur chuan Kum 10 aia rei rorelna fawng kan chelh a ngai a, chutiang tur chuan party mite i ṭang sauh sauh ang u," a ti bawk.